“Në Radio Televizionin publik italian Rai, së shpejti do të flitet arbërisht”. Kështu shkruan Qendra e Studimeve dhe Publikimeve për Arbëreshët, në faqen e saj online.

Ky vendim vjen në kuadër të takimit të 3 korrikut të këtij viti në Senatin e Republikës Italiane në Romë, në Pallatin “Giustiniani” ku u mbajt veprimtaria studimore mbi Arsimin dhe Komunikimin për Mbrojtjen Kushtetuese të Pakicave Gjuhësore Historike Arbëreshe në Itali. Në këtë takim ishte e pranishme edhe prof.Diana Kastrati nga Qendra e Studimeve dhe Publikimeve për Arbëreshët (QSPA).

Kjo veprimtari e promovuar nga Fondacioni “Crucitti”, me president Demetrio Crucitti, ish-drejtor i selisë së Rai-t në Kalabri ishte e një rëndësie të veçantë, pasi në nivel kushtetues solli në vëmendje pakicën gjuhësore arbëreshe, me iniciativën dhe pjesëmarrjen e zv.presidentit të këtij Senati, Maurizio Gasparri.

Komisioni parlamentar për drejtimin dhe mbikqyrjen e përgjithshme të shërbimeve televizive ka paraqitur ndryshimin e Skemës së Kontratës së Shërbimit ndërmjet Ministrisë së Sipërmarrjes dhe Radio Televizionit Publik Italian, Rai në vitet 2023-2028.

Amendamenti i Paragrafit 4, i paraqitur nga nënkryetari Maurizio Gasparri shprehimisht thotë:

Komisioni përcakton zgjedhjen e një selie rajonale të statutit të zakonshëm të Rajoneve, të cilave do t’iu besohen nivelet minimale të mbrojtjes për gjuhën arbëreshe.