Fatkeqësisht ka ndërruar jetë në moshën 61-vjeçare kuzhunieri dhe prezantuesi i famshëm Michael Chiarello, i njohur për kuzhinën italiane në Kaliforni. Ai vdiq në Spitalin Queen of the Valley në Kaliforni. Grupi i restoranteve Gruppo Chiarello njoftoi se kuzhinieri i famshëm ishte shtruar në spital javën e kaluar pasi pësoi një reaksion akut alergjik që çoi në shok anafilaktik.

I lindur në vitin 1962 kuzhinieri arriti ëndrrën e tij të fëmijërisë për t’u bërë një kuzhinier i klasit botëror dhe prezantoi një seri shfaqjesh televizive për një dekadë. Ai u emërua Shefi i Vitit nga revista “Food & Wine” në vitin 1985. Chiarello ishte njohur nga Fondacioni James Beard dhe kishte shkruar disa libra gatimi.

I ndjeri kishte rrënjë italiane dhe amerikane dhe u rrit në komunitetin e Turlock, Kaliforni. Ai u largua nga Turlock për të studiuar në Institutin Kulinar të Amerikës në Nju Jork. Pas diplomimit në 1982, ai fitoi një diplomë bachelor nga Shkolla e Menaxhimit të Turizmit të Universitetit Ndërkombëtar të Floridës. Pikërisht atëherë filloi karriera e tij e shkëlqyer ku dhe hapi restorantin e tij të parë, Toby’s, në Miami. Shpejt u bë i famshëm dhe u kthye në vendlindje për të hapur restorantin Tra Vinge.

Me ndikimin e tij gjithnjë në rritje, Michael Chiarello ka drejtuar shfaqje në PBS, Food Network, Fine Living dhe Cooking Channel për një dekadë, si dhe është shfaqur në Today Show dhe The View. Ai mori pjesë në Bravo’s Top Chef dhe To Chef Masters dhe në vitin 2011 mori pjesë në sezonin e katërt të Food Network’s Next Iron Chef. I ndjeri mbahet mend më së miri për shfaqjen e tij Easy Entertaining With Michael Chiarello, i cili u transmetua për dhjetë sezone në Food Network dhe i dha atij një çmim ‘Emmy Daytime’ në 2005.