Ambasada shqiptare në Pragë ka konfirmuar se nga sulmi vdekje prurës në Fakultetin e Arteve nuk ka shqiptarë të lënduar. Në një intervistë, ambasada thotë se e pranishme në Universitet ka qenë edhe një pedagoge shqiptare, por për fat të mirë nuk ka pësuar asnjë lëndim.

Ndërkohë ministri i Jashtëm, Igli Hasani ka shprehur ngushëllimet për jetët e humbura, ndërsa thotë se “nga informacionet e deritanishme, nuk raportohet për të lënduar me shtetësi shqiptare”.

 “Thellësisht i pikëlluar nga të shtënat tragjike në Pragë sot, që rezultuan në humbjen e disa jetëve të pafajshme. Ngushëllimet e mia të përzemërta për familjet e prekura dhe i uroj shërim sa më të shpejtë të plagosurve.

Shqipëria solidarizohet me miqtë tanë çekë në këtë moment të vështirë”, shkruan në X Igli Hasani.

Sulmi i së enjtes pasdite në fakultetin e arteve të Universitetit Charles, ku mbetën të vrarë 11 persona dhe u plagosën mbi 24 të tjerë është sulmi më fatal që nga pavarësia çeke 30 vjet më parë.

Sulmi më i fundit me armë ishte në dhjetor 2019 në një spital në Ostrava, kur një burrë hapi zjarr në dhomën e pritjes së klinikës së traumës dhe vrau katër burra dhe dy gra, përpara se të kthente armën drejt vetes.

Në shkurt 2015, një vendas hapi zjarr në një restorant në qytetin lindor të Uhersky Brod. Tetë persona humbën jetën në sulm.

Edhe pse sulmet me armë janë të rralla në Republikën Çeke, gjuetia me armë është e popullarizuar. Në vitin 2019, qeveria çeke u përpoq më kot të anulonte një ndalim të BE-së për pushkët gjysmë automatike për përdorim privat, i sjellë pas një serie sulmesh vdekjeprurëse xhihadiste në të gjithë Evropën.