Jason Momoa dhe Lisa Bonet më në fund janë divorcuar. Aktorja tha në një gjykatë në Los Angeles se ajo dhe ylli i “Aquaman” kishin arritur një marrëveshje në lidhje me të drejtat e tyre pronësore dhe martesore, sipas dokumenteve të siguruara nga Page Six. “Palët kanë një marrëveshje me shkrim që do t’i dorëzohet gjykatës, ose një marrëveshje për nxjerrjen e një vendimi do t’i dorëzohet gjykatës”,-thuhet në dokumente.

Divorci quhet “i pakontestueshëm”, që do të thotë se asnjëra palë nuk ka ndërmend ta kundërshtojë atë në gjykatë. Siç është raportuar më parë, 56-vjeçarja bëri kërkesë për divorc nga Momoa pothuajse dy vjet pasi njoftuan ndarjen e tyre. Aktorja kërkoi që të ndajnë me aktorin kujdestarinë e përbashkët fizike dhe ligjore të dy fëmijëve të tyre, Lola dhe Nakoa-Wolf. Ajo gjithashtu renditi datën e ndarjes si 7 tetor 2020, pothuajse 18 muaj para se të zbulonin publikisht se nuk ishin më bashkë.

Ndërkaq, pas divorcit Jason Momoa thotë se është pa shtëpi dhe duke jetuar rrugëve. Ylli i filmit “Aquaman” zbuloi në një intervistë të fundit për Entertainment Tonight se ai nuk ka një shtëpi fikse për momentin. Në vend të kësaj, ai jeton në rrugë. 44-vjeçari tha për Entertainment Tonight:

Vëlla, unë nuk kam as shtëpi tani. Unë jetoj në rrugë. Pra, jam në Zelandën e Re për të filluar realizimin e filmit ‘Minecraft’. Shpresoj që të gjithë ta pëlqejnë. Unë jam gjithmonë në këto vende të çuditshme”. Do të më gjeni në rrugë, kudo. Kjo ndodh gjatë gjithë kohës. Njerëzit më shohin rastësisht dhe thonë çfarë dreqin po bën në qytetin tonë? Më pëlqen ideja për të qenë thjesht me njerëzit e zakonshëm dhe të bëj zanatin tim, që janë xhirimet dhe më pas t’i ndaj ato me njerëzit.

Projekti i ri i aktorit, një dokumentar i quajtur “On the Roam”, ndjek historinë e tij teksa udhëton në vende të ndryshme duke vizituar artizanë të ndryshëm. Ata bëjnë art duke përdorur gjëra të tilla si biçikleta shekullore, instrumente, helikopterë dhe shumë sende të tjera të pazakonta.

Aktori zbuloi gjithashtu se i ka shijuar eksplorimi i zanateve gjatë serialit, i cili do të shfaqet premierë në kanalin HBO Max më 18 janar.

Dua të nderoj njerëzit që më frymëzojnë dhe më pas dua të bëj gjëra që janë vërtet të mira për bamirësi, në mënyrë që ata, ju e dini, të sjellin gjithë këtë lloj vëmendjeje tek këta artizanë. Pra, kur njerëzit të shohin serialin, unë do të futem në Instagram dhe do të përpiqem të vazhdoj që të mund të nxjerr në ankand shumë nga këto gjëra të bukura dhe të shpërndaj pak dashuri.