Një ambivert është një person që ka kombinim të të dy tipareve, introvertit dhe ekstrovertit. Introvertët tërhiqen nga vetmia, ndërsa ambivertët janë diku në mes. Por, si ta kuptoni një ambivert? E kanë të lehtë të përshtaten me situatat. Nëse ekstrovertët janë flutura sociale dhe introvertët janë ujqër të vetmuar, ambivertët janë kameleonë, pra përshtaten në çdo kohë dhe vend. Ambivertët janë më të vështirë për t’u gjetur dhe në varësi të marrëdhënieve që krijojnë me njerëzit, ata mund të klasifikohen si socialë ose të rezervuar, sipas ambientit dhe njerëzve me të cilët zgjedhin të qëndrojnë.

Kur bëhet fjalë për mjediset e punës, ambivertët, ndonëse mund të kenë preferencë për njërën ose tjetrën palë, ata janë të aftë për t’i bërë gjërat vetëm ose me të tjerët. Ambivertët shpesh janë shumë të vetëdijshëm, që do të thotë se ata e dinë se sa shoqëri u nevojitet. Ndaj, zgjedhin personat e duhur për t’u relaksuar. Personat që kanë karakteristikat e ambivertëve kanë vështirësi në marrjen e vendime, pasi duan sigurinë në situata të ndryshme.

Nëse jeni një ambivert, mund të vuani nga forma delikate të vetëkritikës dhe turpit. Ju shpesh i thoni vetes kam nevojë për më shumë kohë për veten. Një person ekstrovert e ka vështirë të krijojë raporte me një person që është një introvert dhe anasjelltas. Si një ambivert, ka të ngjarë që ju të jeni të aftë për t’u lidhur me të gjithë, pasi dini si të krijoni raporte për arsye të ndryshme.