Mosha e një prej dunave më të mëdha të rërës në Tokë është përcaktuar, për herë të parë në histori, nga shkencëtarët. Kjo “dunë ylli ” e veçantë ndodhet në një zonë të largët në Marok. “Dunat asteroide” e marrin këtë emër nga forma e tyre karakteristike dhe lartësia e tyre, e cila arrin qindra metra. Ato përbëjnë 10% të dunave në shkretëtirat e Tokës dhe kryesisht, ato gjenden në Afrikë, Azi dhe Amerikën e Veriut, si dhe në Mars. Deri më tani, ekspertët nuk kanë qenë në gjendje të përcaktojnë saktësisht se kur janë krijuar.

Profesori Jeff Dallaire i Departamentit të Gjeografisë dhe Gjeoshkencave në Universitetin Aberystwyth në Uells, vuri në dukje se këto duna janë mrekulli natyrore të botës. Nga toka ato duken si piramida, por nga lart sheh një majë nga e cila krahët shtrihen në tre ose katër drejtime, duke i bërë ato të duken si yje.

Tani, ekipi shkencor udhëtoi në Marokun juglindor për të studiuar një dunë rëre të quajtur “Lala Lallia”, që do të thotë “pika më e lartë e shenjtë”. Studiuesit zbuluan se baza e dunës është 13,000 vjet e vjetër, por pjesa e sipërme është formuar në 1,000 vitet e fundit. Duna është 100 metra e lartë dhe 700 metra e gjerë me krahë radialë. Pas formimit fillestar, ajo ndaloi së zhvilluari për rreth 8000 vjet dhe më pas u zgjerua me shpejtësi.