Pas armëpushimit, rinisin furnizimet me karburant në Gaza!

vovalbania August 08, 2022 0 koment 1 Mund të lexoni në minuta.
Pas armëpushimit, rinisin furnizimet me karburant në Gaza!

Kamionë të ngarkuar me karburant hynë sot në Gaza, pas një armëpushimi të ndërmjetësuar nga Egjipti mes Izraelit e militantëve të Xhihadit Islamik, duke rritur shpresat se konflikti që la dhjetëra palestinezë të vdekur, tashmë është drejt fundit. Në pikëkalimin e mallrave për në Gazën jugore, një gazetar i AFP-së pa kamionë të ngarkuar me karburant që hynë në pjesën palestineze, duke i dhënë fund një mungese të ndjeshme.

Armëpushimi hyri në fuqi mbrëmjen e së dielës, për t’i dhënë fund dhunës që zgjaste prej tre ditësh mes ushtrisë izraelite e militantëve palestinezë në Gaza. Pasi hyri në fuqi, armëpushimi i ndërmjetësuar nga Egjipti, u respektua nga të dyja palët, pavarësisht të shtënave sporadike në orët e para të tij.

Të paktën 44 palestinezë, mes tyre 15 fëmijë u vranë në sulmet e fundit të ushtrisë izraelite në Gaza, përplasja më e dhunshme mes palëve që prej majit të vitit të kaluar. Liderët e Shteteve të Bashkuara të Amerikës dhe Kombeve të Bashkuara u bënë thirrje palëve, të vazhdojnë të respektojnë armëpushimin.

Joe Biden kërkoi të gjenden mënyrat, që furnizimet humanitare e të karburanteve, të mund të dërgohen në Gaza. Ndër të tjera, shefi i Shtëpisë së Bardhë, apeloi të hetohen rastet e vdekjeve të civilëve. Tensionet e fundit nisën me sulmet izraelite në Rripin e Gazës, kundër kërcënimeve të grupit militant Xhihadi Islamik. Në ditët pasuese, ato u rritën dhe Izraeli arrestoi një anëtar të lartë të Xhihadit, në Bregun Perëndimor.

Ministria palestineze e Shëndetësisë fajësoi “agresionin izraelit” për këto vdekje. Të njëjtat burime raportuan për mbi 300 të plagosur. Autoritetet shëndetësore në Gaza janë të shqetësuara për situatën humanitare. Ndërkohë, Izraeli u shpreh se rezervon të drejtën të “përgjigjet fuqishëm”, nëse shkelet armëpushimi.

Izraeli vrau liderin e dytë të grupit Xhihadi Islamik Palestinez, ndërsa vijon të rritet numri i viktimave nga sulmet ajrore në Gaza. Khaled Mansour gjeti vdekjen nga bombardimet ajrore në shtëpinë e tij në Rafah, në jug të Gazës. Në të kaluarën, Mansour, njeri me ndikim në grup, u mbijetoi 5 përpjekjeve të ushtrisë izraelite për ta vrarë. Ai akuzohej për përgatitje të operacioneve ushtarake jashtë Gazës. Ai dhe lideri tjetër, Tayseer Jabari, janë në mesin e 44 palestinezëve që raportohen të vdekur.

Biletë:

vovalbania

Redaktori nuk ka dhënë ende asnjë informacion për veten e tij.

Total 41929 ka shpërndarë postimin.
MEDIAT SOCIALE