Volodymyr Zelensky ka theksuar përsëri se Ukraina nuk do të negociojë me Vladimir Putin, ai e ka lënë derën hapur për bisedimet e paqes nëse presidenti rus detyrohet të largohet nga detyra.

Presidenti ukrainas ditën e sotme deklaroi se bisedimet mund të kryhen me personat të tjerë që kanë poste të rëndësishme në Rusi.

Sipas Sky News ai tha se paqen po e bllokon vetëm një person, i cili ndodhet në Moskë.

Zelensky foli edhe në takimin virtual me liderët e vendeve të G7 dhe bëri thirrje për një kufizim çmimi për eksportet e naftës dhe gazit të Rusisë, duke argumentuar se kjo do të afronte paqen.

 “Ata do të inkurajojnë shtetin terrorist që të mendojë për paqen, për humbjen e luftës,” tha ai, duke folur përmes një lidhjeje video.

Buxheti i Rusisë mbështetet shumë në të ardhurat nga nafta dhe gazi, dhe shumë nga fondet përdoren për të financuar pushtimin e Moskës kundër Ukrainës – nisur më 24 shkurt.

Zelensky tha se presidenti rus Vladimir Putin ishte ende “një kërcënim për të gjithë ne”, pas dy ditësh të sulmeve ajrore të përhapura në qytete në të gjithë Ukrainën.

“Udhëheqësi rus, i cili tani është në fazën e fundit të mbretërimit të tij, ka ende hapësirë ​​për përshkallëzim të mëtejshëm,” paralajmëroi ai.

Zelensky gjithashtu u kërkoi udhëheqësve të G7 që urgjentisht të sigurojnë armatim të avancuar për të krijuar “mburojë ajrore” për Ukrainën dhe propozoi vendosjen e një “misioni vëzhgues ndërkombëtar” në kufirin midis Ukrainës dhe Bjellorusisë, një aleat kyç i Rusisë.

G7 (Grupi i Shtatë) përbëhet nga ekonomitë më të përparuara dhe demokracitë liberale: Kanadaja, Franca, Gjermania, Italia, Japonia, Britania e Madhe dhe SHBA.