Konventa Kombëtare Zgjedhore e Partisë së Lirisë miratoi ndryshimet statutore. Po ashtu u miratua rezoluta që në thelb ka referendumin.

REZOLUTË E KONVENTËS SË PARTISË SË LIRISË 29 TETOR 2022

Në sistemet demokratike populli ka sovranitet të plotë për t’u shprehur dhe vendosur për ligjet e vendit, të zgjedhë me votë të lirë qeverisjen dhe ta kontrollojë në çdo kohë atë.

Në kushtet kur qeverisjet bllokojnë llogaridhënien dhe uzurpojnë të gjitha pushtetet duke dhunuar votën e lirë, qytetarët kanë vetëm një mënyrë demokratike që të shprehin sovranitetin e tyre: REFERENDUMIN!

Duke vlerësuar se:

– Rendi kushtetues është tronditur si kurrë ndonjëherë, gjatë dy dekadave të fundit;

– Qeverisja në mënyrë autokratike bën gjithçka për të grabitur dhe blerë vullnetin e qytetarëve nëpërmjet përndjekjes dhe kërcënimit me privime nga të drejta jetësore të individit apo familjes së tyre, si ato të punësimit, të të ardhurave apo të pronës, duke angazhuar haptazi botën e krimit në grabitjen e pushtetit;

-Qeverisja shkel me arrogancë, haptazi dhe qëllimshëm ligjet, rregullat dhe ligjin themelor të shtetit, Kushtetutën;

– Kasta në fuqi grabit pronën publike dhe atë private në funksion të pasurimit të tejskajshëm të saj;

-Qeverisja ka eliminuar plotësisht llogaridhënien përpara qytetarëve dhe në çdo nivel të saj;

-Qeveria ka krijuar një ekonomi publike në funksion vetëm të pasurimit të kryeministrit dhe klanit pranë tij, duke sjellë dëme dhe defekte të rënda në funksionimin e qëndrueshëm të ekonomisë kombëtare;

-Qeveria ka fuqizuar pak grupe biznesi të lidhura me krimin dhe grupe mediatike në shërbim të verbër të qeverisjes dhe propagandës me qëllim deformimin dhe manipulimin e opinionit publik;

-Kushtetuta është miratuar me Referendum nga populli shqiptar në 22 nëntor 1998 ndërsa amendimet e çështjeve thelbësore të saj nuk janë miratuar me referendum;

-Pas miratimit të Kushtetutës në vitin 1998, mungesa e vullnetit politik ka krijuar situatë të rëndë dhe absurde, duke i mohuar shqiptarëve të drejtën për të vendosur vetë përmes Referendumit për çështje me rëndësi kombëtare;

-Në 24 vite pas miratimit të Kushtetutës asnjë propozim për referendum nuk është miratuar nga Kuvendi i Shqipërisë;

-Politika dhe shumicat qeverisëse kanë bllokuar ushtrimin e drejtpërdrejtë të vullnetit popullit për të vendosur vetë.
Partia e Lirisë angazhohet për:

-Kthimin e vendit në normalitet demokratik, ku vullneti i qytetarëve zgjedh qeverisjen dhe imponon llogaridhënien e saj, duke zbatuar Referendumin si formën më të lartë të demokracisë direkte dhe si garantor se vullneti i qytetarëve nuk do të merret peng nga keq-qeverisja;

-Marrjen e të gjitha nismave ligjore për miratimin e Ligjit për Referendumet, me qëllim zbatimin real të kësaj të drejte kushtetuese themelore.

-Ndërmarrjen e çdo veprimi për institucionalizimin e referendumit, të këtij instrumenti thellësisht demokratik me efekte të shumëfishta, në drejtim të përmirësimit të qeverisjes, llogaridhënies së saj përpara qytetarëve dhe organeve ligjzbatuese, angazhimit cilësor civil dhe politik të qytetarëve në politikë-bërje dhe rritjes së besimit të humbur të qytetarit te politika.

-Ndërmarrjen e çdo veprimi ligjor e institucional për miratimin e rregullave sa më të thjeshta të kuadrit ligjor, për organizimin e shpejtë dhe pa pengesa të Referendumeve Kombëtare dhe Lokale.

Duke pasur parasysh se Referendumi është instrumenti funksional i vetëm i demokracisë së drejtpërdrejtë për çdo çështje me rëndësi lokale apo kombëtare,

Partia e Lirisë do të sanksionojë në legjislacion që:

-Çdo ndryshim/amendim në Kushtetutën e Republikës së Shqipërisë të mos bëhet më vetëm nga deputetët.

Ndryshimet në Kushtetutë duhet të realizohen vetëm përmes Referendumit, që është edhe vullneti i drejtpërdrejtë i popullit.
Kushtetuta është miratuar nga populli me Referendum në vitin 1998, ndaj çdo germë apo nen i ndryshuar i saj duhet të ratifikohet përmes shprehjes së vullnetit të qytetarëve;

– Mega-Projektet kombëtare me vlerë prej qindra miliona eurosh, që zënë një përqindje të lartë shpenzimesh nga Buxheti i Shtetit, duhet të marrin miratimin e popullit. Nuk mundet që një kontratë koncesionare që prek jetën e qytetarëve dhe ndikon në mënyrë të ndjeshme në ekonominë e vendit për periudha të gjata kohore për 30- 99 vjet të miratohet vetëm nga qeveria, ndërkohë që janë qytetarët shqiptarë ata që paguajnë nga xhepi i tyre për këto projekte;

– Ndryshimet në Kodin e Familjes, projektligjet që kanë të bëjnë me institucionin e familjes, prindërimit dhe birësimit, nuk mund të bëhen vetëm nga politikanë apo ligjvënës, që mund të kenë axhenda të caktuara personale, politike apo ideologjike, por duhen vendosur e sanksionuar nga populli përmes Referendumit sepse vetëm populli mund të vendosë mbi vlerat universale dhe morale, traditat e institucionit të martesës, modelin e familjes, dhe mënyrën e prindërimit.

– Të gjitha objektet, zonat, pasuritë kombëtare me vlera universale, sitet arkeologjike, të klasifikuara si trashëgimi kulturore dhe pasuri kombëtare të mos jepen në përdorim, të të tretëve apo me koncension pa miratimin e vullnetit popullor përmes Referendumit.

– Mega-Projektet rajonale të financuara nga Njësitë e Pushtetit Vendor duhen miratuar, përmes Referendumit, nga banorët e njësive vendore ku zhvillohet aktiviteti i këtyre projekteve dhe investimeve, ose përmes referendumeve kombëtare kur çështje të kësaj natyre kanë efekte në nivel kombëtar.

– Përmes Referendumit qytetarët do të vendosin për ruajtjen e identitetit dhe të ardhmen e qytetit të tyre sidomos për objekte dhe site arkeologjike dhe të trashëgimisë kulturore.

Referendumi është instrumenti më demokratik që i garanton lirinë sovranit.

Në fjalën e tij, Ilir Meta e cilësoi Partinë e Lirisë, “parti të shpresës, ndërsa theksoi se misioni kryesor është të pengojë të rinjtë të emigrojnë”.

Partia e Lirisë është alternativa e shpresës për të zgjuar guximin qytetar dhe shpirtin e lirë e patriotik. Misioni ynë është që Shqipëria t’u përkasë të rinjve. Ndaj ne do të bëjmë çdo sakrificë për të ndaluar shpopullimin, këtë hemorragji që po vret vitalitetin, energjinë e Shqipërisë, të rinjtë dhe profesionistët e që po kërcënon identitetin, të ardhmen e kombit e të familjeve tona.

Vetëm për shkak të Rilindjes, Shqipëria, vendi me moshën e popullsisë më të re në Europë deri para 10  vitesh, sot është vendi me shpopullimin më dramatik në Europë. Vetëm për shkak të Rilindjes, qytetarë të pafajshëm, të rinj dhe fëmijë, vriten në mënyrë të përsëritur nga dora e policisë dhe askush nuk dënohet e jep llogari.

Meta, i cili dy ditë më parë firmosi marrëveshjen me kreun demokrat, Berisha për të dalë me kandidatë të përbashkët në zgjedhjet lokale të 14 majit, u shpreh:

Shqipëria do t’i përkasë të rinjve, sepse një shoqëri dhe një popull pa rini është si një trup pa shpirt. Kjo bindje e palëkundur duhet të mbajë gjallë frymën dhe kauzën madhore të Partisë së Lirisë e Opozitës së Bashkuar.

Në këtë mbledhje të gjatë të PL-së do të votëbesohet kryetari i partisë, ku Meta është i vetmi kandidat.