Njeriu që udhëhoqi Portugalinë, Fernando Santos drejt lavdisë së Euros në vitin 2016 është shkarkuar nga posti i trajnerit.

Pas humbjes në çerekfinale të Kupës së Botës me Marokun, Fabrizio Romano raporton se është marrë vendimi nga Federata Portugeze e Futbollit për të hequr Fernando Santos nga posti i tij.

Një menaxher i ri do të emërohet në javët në vijim. Sipas mediave të huaja, pritet që posti i drejtimit të kombëtares portugeze t’i besohet Jose Mourinhos i cili aktualisht është trajner i skuadrës së Romës.

Santos, 68 vjeç, mori drejtimin e Portugalisë në vitin 2014 pas katër vitesh me Greqinë në të njëjtin rol. Në Euro 2016, Portugalia mposhti Francën mikpritëse të turneut me shifrën 1-0 në kohën shtesë me golin e Ederit. Fitorja përfaqësoi nderin e parë të madh ndërkombëtar të Portugalisë.

Santos e përfundon mandatin e tij si trajner me 67 fitore, 23 barazime dhe 19 humbje në 109 ndeshje.