Tatjana Patitz, një nga supermodelet më të famshme të viteve ’80 dhe ’90, ka ndërruar jetë në moshën 56-vjeçare. Nuk është bërë i ditur shkaku i vdekjes së gruas gjermane, e cila ka qenë edhe në videoklipin “Freedom” të George Michael, së bashku me Cindy Crawford, Linda Evangelista dhe Christy Turlington. “Ajo ishte më e “padukshme” sesa koleget e saj, më misterioze, më e pjekur dhe kjo gjë e bënte më tërheqëse”, tha Anna Wintour, kryeredaktorja e Vogue.

Në një intervistë të vitit 1988 me revistën Vogue, ajo ia atribuoi suksesin e saj “duke mos u dukur si dikush tjetër”.

Njerëzit gjithmonë thoshin se dukesha e veçantë… Dhe unë do t’ia dilja për shkak të kësaj.

Patitz lindi në Hamburg në vitin 1966, nga një nënë estoneze dhe një baba gjerman. Familja e saj shpejt u zhvendos në Suedi. Asaj iu deshën disa vite që karriera e saj të ngrihej. Megjithatë, në vitin 1988, ajo u pikas nga fotografi i profilit të lartë të modës Peter Lindbergh.

Patitz u shfaq gjithashtu në kopertinën e famshme britanike të Vogue të vitit 1990, së bashku me kolegët e saj supermodele Cindy Crawford, Naomi Campbell, Linda Evangelista dhe Christy Turlington, duke forcuar statusin e saj si një nga pesë supermodelet “origjinale” të viteve 1990.

Ajo gjithashtu ka punuar për Chanel, Calvin Klein dhe Versace. Paraqitja më e fundit e Patitz në pasarelë ishte në shfaqjen Etro në shkurt 2019 si pjesë e javës së modës në Milano, sipas agjencisë së lajmeve Reuters. Ajo ka lënë pas djalin e saj 19-vjeçar, Jonah.