Regjisorja Catherine Hardwicke ka treguar se është paguar vetëm tre dollarë për të xhiruar filmin e vitit 2003, “Thirteen”, sepse studiot filmike nuk dëshironin të xhironin një film tjetër për vajzat adoleshente. Dy dekada pas publikimit të filmit që e shkroi për vetëm gjashtë ditë, regjisorja ka rrëfyer për mediat e huaja, vështirësitë e realizimit të atij projekti.

Për të parë këtë film, fëmijët nën 17 vjeç kërkohej të kenë prind shoqërues ose kujdestar të rritur. Ky vlerësim do të thotë se filmi përmban materiale për të rritur, si p.sh. aktivitet për të rritur, gjuhë të ashpër, dhunë grafike intensive, abuzim me drogën dhe nuditet. Filmi nuk është i përshtatshëm për t’u parë nga fëmijët për shkak të dhunës, gjuhës fyese ose aktivitetit seksual. Hardwicke rrëfen:

Secila studio dhe secili financues thoshin: ‘Jo, nuk mund ta bëjmë. Si mund të bëjmë një film që do të jetë jo i përshtatshëm për të gjitha moshat me një vajzë 13 vjeçare të panjohur në rolin kryesor?’ Të gjithë thoshin jo.

Ajo ka thënë se nuk hoqi dorë nga realizmi dhe u bazua në një financim të pavarur duke e realizuar filmin me një buxhet prej afro dy milionë dollarësh, ndërsa u xhirua brenda 24 ditësh. Regjisorja vijoi:

Unë u pagova tre dollarë për gjithë kohën. Por, kur e realizuam, njerëzit thoshin: ‘Oh, është i fuqishëm. Është prekës. Është relevante me atë që njerëzit po kalojnë’.

Filmi fokusohet te një vajzë adoleshente, Tracy Freehand, e luajtur nga Evan Rachel Wood, kur marrëdhënia e ngushtë me nënën Melanie e luajtur nga Holly Hunter, bëhet e tendosur, pasi shoqja e saj e re, Evie Zamora (Nikki Reed), e prezanton me seksin, drogën dhe sjelljen rebele. “Thirteen” debutoi në Sundance Film Festival në janar të vitit 2003, ndërsa tashmë 20 vjet pas publikimit është bërë viral në TikTok.