Rreth 100 mijë persona janë evakuuar nga fshatrat e përmbytura në provincën Punjab, Pakistan. Shërbimet e urgjencës thanë se kanë punuar për evakuimin e banorëve dhe bagëtive në zonat më të rrezikuara. “Ne kemi shpëtuar 100 mijë njerëz dhe i kemi transferuar në vende më të sigurta”,-tha zëdhënësi i shërbimeve të urgjencës në Punjab, Farooq Ahmad.

Kreu i qeverisjes në Punjab, Mohsin Naqvi, tha se reshjet e dendura të shiut i kishin shtyrë autoritetet në Indi të lëshonin ujin e tepërt të rezervuarit në lumin Sutlej, duke shkaktuar përmbytje në anën pakistaneze të kufirit. Zyrtarët në anën indiane nuk u janë përgjigjur pyetjeve të bëra nga AFP lidhur me këto akuza.

Agjencia e menaxhimit të fatkeqësive në Punjab paralajmëroi se shirat e parashikuar mund ta përkeqësojnë gjendjen me përmbytjet gjatë ditëve në vijim. Autoritetet pakistaneze kanë vlerësuar se dëmet e shkaktuara nga vërshimet arrijnë në vlerën e të paktën 10 miliardë dollarësh.