Kryeministri britanik Rishi Sunak gjatë turit në Lindjen e Mesme është ndalur në Egjipt, ku po zhvillon bisedime me presidentin egjiptian Abdul Fattah al-Sisi.

Më herët gjatë ditës së sotme Sunak u takua me amirin e Katarit në Arabinë Saudite si pjesë e turneut të tij në rajon.

Një zëdhënëse e kryeministrit tha se prioriteti i Mbretërisë së Bashkuar është të fokusohet në hapjen e kalimit Rafah për ndihmë humanitare.

“Të gjithë liderët duhet të punojnë së bashku për të shmangur çdo përshkallëzim rajonal dhe për të siguruar që ndihma humanitare të arrijë civilët në Gaza”, shkroi Sunak në platformën “X”.

Egjipti ka deklaruar se po përgatitet për një samit paqeje, në përpjekje për të de-përshkallëzuar konfliktin dhe për të mbrojtur civilët në Gaza.

Takimi i planifikuar për t’u mbajtur të shtunën, do të jetë me pjesëmarrjen e liderëve rajonalë dhe ndërkombëtarë. Liderët nga Katari, Turqia, Greqia, Jordania, Emiratet e Bashkuara Arabe, Bahreini, Kuvajti, Arabia Saudite, Iraku dhe Qiproja kanë konfirmuar pjesëmarrjen, sipas lajmeve shtetërore.

Përveç kësaj, një udhëheqës palestinez, sekretari i përgjithshëm i Kombeve të Bashkuara dhe sekretari i përgjithshëm i Ligës Arabe kanë konfirmuar gjithashtu pjesëmarrjen, tha presidenti egjiptian Abdel Fattah al-Sisi.

Nga ana tjetër, Japonia konfirmoi se ministrja e saj e jashtme Yoko Kamikawa do të jetë gjithashtu në samit.

Më herët të premten, zyra e Ministres së Jashtme gjermane Annalena Baerbock tha se ajo po zgjat udhëtimin e saj në Lindjen e Mesme për të marrë pjesë gjithashtu në samit.