Dara e motit të keq “mbërthen” vendin!

AKTUALITET

Dara e motit të keq “mbërthen” vendin!

vovalbania November 03, 2023 0 koment 1 Mund të lexoni në minuta.

Shërbimi Meteorologjik Ushtarak bëri të ditur se për ditën e sotme vendi ynë do të ndikohet nga kushte atmosferike të paqëndrueshme, për shkak të kalimit të një fronti të ftohtë atmosferik, shoqëruar me masa ajrore të lagështa me origjinë perëndimore.

Moti nisi me kthjellime e alternime vranësirash, të cilat gradualisht vijnë në shtim e bëhen deri të dendura. Pas orëve të mesditës, pritet mot me vranësira të dendura në pjesën më të madhe të territorit, si edhe reshje shiu të vazhdueshme me intensitet të ulët e kryesisht mesatar. Në orët e pasdites dhe mbrëmjes, në një pjesë të madhe të vendit, reshjet do të jenë me intensitet mesatar e të lartë në formën e rrebesheve, si dhe stuhive, shoqëruar me shkarkesa të forta elektrike e breshër. Në periudha afatshkurtra, reshjet bëhen të rrëmbyeshme.

Era do të fryjë intensive me drejtim juglindje – jugperëndim e me shpejtësi mesatare 3-12 m/s, ndërsa në bregdet dhe lugina, era bëhet tepër intensive dhe problematike me shpejtësi 16-25 m/s. Intensiteti i erës bie në pjesën e dytë të ditës dhe arrin në shpejtësi 1-12 m/s. Valëzimi në dete është i lartë, i forcës 5-7 ballë.