Aktori Peter White, i njohur më së shumti për rolin e tij në telenovelën “All My Children” dhe në adaptimet e shumta të “The Boys in the Band”, ka ndërruar jetë në moshën 86-vjeçare. White ndërroi jetë në shtëpinë e tij në Los Angeles të mërkurën, konfirmoi aktorja e “All My Children”, Kathleen Noone për mediat e huaja.

Aktori i lindur në New York, i cili kishte festuar ditëlindjen e tij të 86-të muajin e kaluar, portretizoi personazhin Linc Tyler në “All My Children” të ABC në 12 episode të serialit nga 1976-2005. White luajti rolin e Alan McCarthy në “The Boys in the Band”, si në skenë ashtu edhe në filmin e vitit 1970 nga regjisori William Friedkin.

White ishte i diplomuar në Universitetin Northwestern dhe gjithashtu kishte studiuar profesionin e tij si aktor në Shkollën e Dramës në Yale. Peter filloi në televizionin CBS serialin “The Secret Storm” nga 1965-1966, duke portretizuar personazhin Jerry Ames, si dhe ai gjithashtu u shfaq në serialin “NYPD” në 1968 në një rol të shkurtër si i ftuar.

White luajti rolin e Dr. Sanford Hiller në televizionin CBS “Love Is a Many-Splendored Thing” në 1971, duke u shfaqur gjithashtu në filmin “The Pursuit of Happiness” atë vit. Roli i tij i parë në Broadway erdhi në vitin 1975 në shfaqjen “Your cat is dead”. White gjithashtu pati një shfaqje të zgjatur në serialin e ABC, “The Colbys” në 1985-1986, duke portretizuar rolin e avokatit Arthur Cates në 16 episode të dy sezoneve fillestare të shfaqjes.

Ai u shfaq gjithashtu në 14 episode të shfaqjes së NBC, “Sisters” nga 1991-1996, duke luajtur rolin e Dr. Thomas Reed, babai i ndjerë i personazheve të luajtur nga Swoosie Kurtz, Sela Ward, Patricia Kalember dhe Julianne Phillips. White kishte luajtur në shumë filma në karrierën e tij, duke përfshirë “First Daughter” e vitit 2004, “Armageddon” e 1998, “Flubber” e 1997 dhe “Dave” e 1993. Roli i tij i fundit erdhi në filmin “Punching Henry” të vitit 2016. Peter kishte punuar si trajner i aktrimit në vitet e fundit, raportuan mediat e huaja.