Një në tre fëmijë, ose më saktë 739 milionë të vegjël në mbarë botën, jetojnë në zona me mungesa të mëdha të ujit. Alarmi lëshohet në një raport të programit UNICEF të Kombeve të Bashkuara lidhur me efektet e ndryshimeve klimatike.

Sasitë e pamjaftueshme të ujit të pijshëm dhe për shërbime higjienike mund ta përkeqësojnë edhe më tej këtë situatë.

Në raportin e publikuar përpara samitit për klimën COP28, rezulton se shumica dërrmuese e fëmijëve që vuajnë mungesën e sasive të nevojshme të ujit gjenden në zonat e Lindjes së Mesme, Afrikës së Veriut dhe Azisë Jugore.

Nga analiza e UNICEF vërehet se gjatë vitit 2022, 436 milionë fëmijë janë përballur me nivele ekstreme të mungesës së ujit, gjë e cila ka vendosur në rrezik shëndetin, mirëqenien dhe jetën e tyre.

Madje konsiderohet si një nga shkaktarët kryesorë të vdekjeve mes fëmijëve nën 5 vjeç nga sëmundjen e parandalueshme. Sipas raportit të agjencisë së OKB-së, ndryshimet klimatike po përkeqësojnë raportin mes kërkesës dhe sasisë së disponueshme të ujit në zona të ndryshme të botës.

UNICEF rekomandon që në këto rrethana, të bëhen investime në infrastrukturën për sigurimin e ujit të pijshëm dhe për përdorim sanitar, në mënyrë që të mbrohen fëmijët nga impakti i ndryshimeve klimatike.

Kërkohet dhe shtimi i fondeve për mbrojtjen e të vegjëlve, pasi aktualisht vetëm 2.4 për qind e financimeve për klimën shkojnë për projekte lidhur me fëmijët.

UNICEF, i quajtur fillimisht Fondi Ndërkombëtar i Kombeve të Bashkuara për Emergjencën e Fëmijëve, tashmë zyrtarisht Fondi i Kombeve të Bashkuara për Fëmijët, është një agjenci e Kombeve të Bashkuara përgjegjëse për ofrimin e ndihmës humanitare dhe zhvillimore për fëmijët në mbarë botën.

UNICEF u krijua nga Asambleja e Përgjithshme e Kombeve të Bashkuara më 11 dhjetor 1946, për të ofruar ushqim dhe kujdes shëndetësor urgjent për fëmijët dhe nënat në vendet që ishin shkatërruar nga Lufta e Dytë Botërore.