Pema e re e Krishtlindjes Gucci në Galleria Vittorio Emanuele në Milano, e inauguruar nga kryebashkiaku Beppe Sala ka ngjallur shumë polemika. Nuk është bredhi klasik me degë të gjelbra, drita dhe dekorime por përkundrazi është një instalacion i përbërë nga 78 “pako” dhuratash me simbolin ikonik të shenjës së kuajve të shtëpisë, mbivendosur për të krijuar një strukturë të një peme gati 9 metra e gjatë. “The gift of love” quhet vepra, e pranishme edhe në butikët e shtëpisë së modës toskane, pjesë e gjigantit francez të luksit Kering.⁠

E hapur për publikun, ceremonia e ndriçimit të pemës u organizua nga kryetari i bashkisë së Milanos, Giuseppe Sala, presidenti, shefi ekzekutiv i Gucci, Jean-François Palus, aktorja italiane, kumbarja e ngjarjes Margherita Buy si dhe Anna Dello Russo. “Vendi ku po qëndrojmë njihet në mbarë botën si simbol i bukurisë së këtij qyteti. Me pemën Gucci me të cilën po dekorojmë Galerinë, duam të përhapim një mesazh gëzimi dhe bukurie me të gjithë ju dhe gjithë qytetin e Milanos”,-tha Palus gjatë ceremonisë.

Kutitë e dhuratave do të jenë një motiv i përsëritur për festat e markës, pasi ato gjithashtu do të zbukurojnë vitrinat e dyqaneve Gucci dhe do të zbukurojnë ambientet e brendshme të njësive të zgjedhura në mbarë botën. Disa nga materialet që përbëjnë kutitë e dhuratave do t’i dhurohen ForMattArt, një shoqatë kulturore për përparimin social që promovon aktivitete të orientuara drejt solidaritetit social dhe edukimit.

Sponsorizimi i Gucci-t për pemën e Krishtlindjes të Milanos është pjesë e një projekti të gjerë që synon promovimin e bukurisë dhe përmirësimin e zonave gjysmë periferike të qytetit. Për shembull, në bashkëpunim me ForMattArt, marka u zotua të ndriçojë pjesë të lagjes Corvetto në zonën jugore të Milanos dhe të zbukurojë hyrjet në tre prej shkollave kryesore në rreth, në një iniciativë të zbuluar me rastin e Ditës Botërore të Fëmijëve më 20 nëntor. Fëmijët u përfshinë gjithashtu në punët artistike për të krijuar dekorime për shkollat e tyre rreth temës së të drejtave të fëmijëve dhe adoleshentëve.