Prokuroria e Posaçme Antikorrupsion ka shpallur pretencën për ish-kryebashkiakun e Bulqizës, Lefter Alla, për të cilin kërkon 3.6 vite burg.

Me aplikim të gjykimit të shkurtuar, për Allën mbeten 2.4 vite burg.

SPAK kërkon 4 vite heqje lirie për Erion Isakun dhe Rasim Dacin (2.8 vite me gjykim të shkurtuar), 3 vite burg për Enkelejda Lleshin (me gjykim të shkurtuar, 2 vite burg), 2.3 vite burgim për Aqif Koneshën (1.5 vite me gjykim të shkurtuar), nga dy vite për Rubin Kolën, Arsen Gjokën, Kujtim Zogun e Leonard Daçin (me aplikimin e gjykimit të shkurtuar, 1.4 vite burg) si dhe 1.9 vite burg për Dali Gazidedjën (1.2 vite me gjykim të shkurtuar).

Lefter Alla, ra në pranga më 15 mars 2023 bashkë me 12 persona të tjerë, 7 prej tyre zyrtarë të bashkisë për shkelje të barazisë në tendera dhe shpërdorim detyre mbi dyshimet e abuzimit në një tender me vlerë 3 milionë euro. Ai dyshohet në bashkëpunim me ish-zyrtarët e tjerë favorizoi dy kompani gjatë procedurës së prokurimit publik me qëllim që më pas punimet për ujësjellësin t’i kryejë kompania ‘OE 2AF Albania shpk’, e cila është në administrimin e të afërmit të Allës, Aqif Konesha. Kompanitë që dolën fituese të tenderit kishin ‘BOE Egland shpk’ dhe ‘BE-IS shpk’.

Pasi i shpallën fituese këto firma, punimet për uijësjellësin realizoheshin nga firma ‘OE 2AF Albania shpk’. Bëhet fjalë për tenderin “Ndërtimi rrjetit furnizimit dhe rrjetit shpërndarës Ujësjellësi dhe ndërtimi i rrjetit të KUZ , Lagja e vjetër, qyteti Bulqizë, Bashkia Bulqizë”, me vlerë rreth 3 mln euro, me afat kohor 10 mujor. Kompanitë që dolën fituese të tenderit kanë si administrator Rasim Dacin, për ‘BOE Egland shpk’, ndërsa administratori i ‘BE-IS shpk’, është Kastriot Ibrahimaj. Gjatë dëshmisë së tij, Alla i konsideroi akuzat si sulme politike ndaj tij.