Lufta në Ukrainë arrin në ditën e 675-të dhe sulmet janë intensifikuar nga të dyja palët. Rusët bombarduan qytetin e Khersonit “në një shkallë të gjerë”, ndërsa ukrainasit vepruan në Belgorod duke shkaktuar të paktën një viktimë.

Gjatë mbledhjes së Këshillit të Sigurimit të OKB-së, përfaqësuesi i përhershëm i Rusisë, Vasily Nebenzya tha se planet ushtarake të Kievit “kanë dështuar, kështu që regjimi ukrainas dhe mbështetësit e tij perëndimorë do të përballen me lajmet më të këqija në të ardhmen e afërt”.

Më parë, Ukraina pësoi sulmin më agresiv që nga pushtimi rus, i cili synoi disa qytete dhe shkaktoi 32 të vdekur dhe 160 të plagosur. Rajonet e Kievit, Lvivit, Sumyt, Odesës, Kharkivit, Zaporizhzhias dhe Dnipros ishin në shënjestër. U goditën një spital dhe një qendër tregtare.

Presidenti ukrainas, Volodymyr Zelensky i tha OKB-së se “është thelbësore që bota të reagojë ndaj këtij akti të fundit terrorizmi”.

Këshilli i Sigurimit i Kombeve të Bashkuara u mblodh për të diskutuar “sulmin ajror më masiv” të Rusisë në të gjithë Ukrainën që nga fillimi i luftës, në shkurt të vitit 2022. Gjatë sulmit u përdorën 122 raketa dhe dhjetëra dronë, sipas zyrtarëve ukrainas. Ukraina dhe dhjetëra vende anëtare të OKB-së kërkuan mbledhjen e Këshillit të Sigurimit pas sulmeve, “që rezultuan në viktima të shumta civile dhe shkatërrim të rëndë të infrastrukturës civile”.

Anëtarët e Këshillit të Sigurimit të OKB-së, ndër to Shtetet e Bashkuara, Franca dhe Britania e Madhe i dënuan sulmet, duke i quajtur “përpjekje e dëshpëruar dhe e kotë e Rusisë për të rifituar avantazhin”, në luftën me Ukrainën.

Në një deklaratë, presidenti amerikan, Joe Biden u shpreh:

Sulmi ishte një kujtesë e ashpër për botën se pas gati dy vitesh të kësaj lufte shkatërruese, objektivi i Putinit mbetet i pandryshuar, duke kërkuar të shkatërrojë Ukrainën dhe të nënshtrojë popullin e saj. Putin duhet ndalur!

Megjithëse Shtetet e Bashkuara kanë ndihmuar deri më tani Ukrainën, Kongresi duhet të shtojë përpjekjet e tij e të miratojë më shumë ndihma, pa ndonjë vonesë të mëtejshme ose ne nuk do të jemi në gjendje të vazhdojmë dërgimin e armëve dhe sistemeve jetike të mbrojtjes ajrore. Ukraina duhet të mbrojë popullin e saj.

Rëndësia e kësaj lufte shtrihet shumë përtej Ukrainës. Ajo ndikon në tërësinë e NATO-s, sigurinë e Europës dhe të ardhmen e marrëdhënieve transatlantike. Shtetet e Bashkuara kanë mbledhur një koalicion prej më shumë se 50 vendesh për të mbështetur mbrojtjen e Ukrainës. Ne nuk mund të zhgënjejmë aleatët dhe partnerët tanë. Ne nuk mund të braktisim Ukrainën.