Policia britanike po heton një rast që përfshin përdhunimin e supozuar të avatarit të një adoleshenteje (personazh digjital i personalizuar) nga të panjohur në një lojë realiteti virtual. Sipas Euronews, është hera e parë që një hetim i tillë kryhet për një sulm seksual në “metaverse”. Siç sqaron publikimi, viktima, e cila në momentin e sulmit ishte e lidhur me universin virtual me një kufje, nuk ka pësuar asnjë dëmtim fizik.

Autoritetet britanike nuk dhanë detaje të mëtejshme për rrethanat në të cilat ndodhi sulmi në metaverse, për të mbrojtur privatësinë e vajzës së mitur. Edhe pse adoleshentja nuk ka përjetuar abuzim fizik, burimet policore thonë se ajo mund të ketë pësuar trauma psikologjike të krahasueshme me atë të një viktime përdhunimi në jetën reale.

“Ka efekte emocionale dhe psikologjike mbi viktimën që mund t’i ndikojë për shumë më gjatë se çdo lëndim fizik”- tha një oficer i lartë i policisë për Daily Mail. Megjithatë, autoritetet britanike janë të shqetësuar se sipas ligjit aktual, i cili përkufizon sulmin seksual si “prekje fizike” jo-konsensuale në një mënyrë seksuale, ndjekja penale e të dyshuarve mund të jetë e pamundur.

Hetimi ka tërhequr kritika nga qytetarët që besojnë se policia nuk duhet t’i kushtojë burime dhe kohë hetimit të krimeve virtuale, ndërkohë që rastet e përdhunimeve në jetën reale vazhdojnë të rriten. Një hulumtim i fundit i realizuar nga Meta ka parashikuar që metaverse dhe teknologjitë përreth saj, VR dhe AR do të kalojnë një ditë telefonat celularë si platforma kryesore për informatikë. Sipas studimeve të ndërmarra nga firma konsulente Deloitte, Metaverse ka potencialin të kontribuojë me rreth 2.4% të Prodhimit të Brendshëm Bruto (GJDP) të Shteteve të Bashkuara deri në vitin 2035. Kjo është deri në 760 miliardë dollarë. Kjo shifër përfshin gjithashtu teknologjinë e prodhimit, mjekësore dhe të mbrojtjes.