Kaosi dhe zhurma, mbyllet në 20 minuta seanca plenare/Noka i kthehet Bashës!
Seanca e sotme plenare nuk bëri dallim nga të kaluarat. Pjesa e deputetëve të grupeve Bardhi-Berisha që u lejua të ishte në sallë, oamundësoi zhvillimin e punimeve normale duke bllokuar foltoren. Edi Paloka dogji rregulloren e Parlamentit ndërsa jashtë prisnin 23 deputetë që nuk u lejuan të merrnin pjesë pas përjashtimeve me disa ditë për shkak të kaosit në seancat e kaluara.
Flamur Noka spërkati me miell shkallët e Kuvendit, duke simbolizuar vizat e kokainës dhe nuk e kurseu miellin as për punonjësit e Gardës e Sekretarin e Përgjithshëm të Kuvendit, Genc Gjonçaj. Po ashtu u hodhën vezë ndaj makinës së ministrit të Brendshëm, Taulant Balla e gjithashtu kundrejt automjetit të Gjonçajt.
Mes zhurmës e bllokimit të foltores, maxhoranca vijoi me miratimin e projektligjeve në rend dite. Por, hoqi atë që rikthen bastet online, si dhe u rrëzuan dy amendamente të paraqitura nga Lulzim Basha. Ndërkaq, Basha ishte në sallë dhe në dalje e priste Flamur Noka, i cili iu drejtua me fjalë të ashpra:
Je tradhtar, je i pabesë, je i paburrë, je mercenar!
Ndërsa disa deputetë të opozitës ndodheshin në foltore, Enkelejd Alibeaj ishte i ulur në vendin e tij. Kolegu i “Rithemelimit” Petrit Doda i kërkonte të mos rrinte aty, por t’i afrohej foltores, por Alibeaj vazhdoi të ruante qetësinë me duart e kryqëzuara, ndërsa një efektiv i Gardës largoi Dodën.