Paraqitjet e mira të Ernest Muçit me Legia Warsawa, duket se nuk kanë ngelur pa rënë në sy dhe pa tërhequr vëmendjen dhe interesin e klubeve të mëdha evropiane. Ernest Muçi bëhet gati për hapin e radhës në karrierën e tij. Sulmuesi i Kombëtares shqiptare pritet të firmosë sot me një prej ekipeve më të njohura në Turqi, Besiktas. Merkato e futbollit turk nuk është mbyllur ende dhe klubet në këtë vend janë duke bërë lëvizjet e fundit për të përforcuar radhët e tyre. Beshiktashi është një nga skuadrat që po kërkon më shumë lojtarë cilësorë pasi nuk ia ka dalë deri tani që të rivalizojë për pozitat e rëndësishme në klasifikim. Mediat turke raportojnë se mbrëmë është gjetur akordi mes palëve për transferimin e Muçit nga Legia Warsawa.

Sipas “Fanatik”, lojtari është dakord për transferimin dhe ka rënë dakord për të firmosur një marrëvessje që e lidh me Beshiktash deri në verën e vitit 2027. Klubi i Legias ndërkohë do të regjistrojë një fitim të ndjeshëm për transferimin e Muçit, pasi nga 500 mijë euro që shpenzoi për ta blerë nga Tirana në vitin 2021, tashmë do ta shesë për rreth 10 milionë euro. Muçi pritet të kryejë sot vizitat mjekësore dhe të prezantohet në klubin e ri në Turqi ku do të vazhdojë karrierën e tij.