Policia e Kosovës ndaloi dy të dyshuar lidhur me rastin e shpërndarjes së disa fletushkave në Mitrovicë të Veriut, me shumicë serbe. Përmes tyre u bë “thirrje për rezistencë”. Zëvendësdrejtori për Rajonin e Veriut, Veton Elshani, tha se autoritetet e rendit janë në kërkim të një të dyshuari të tretë. Elshani u shpreh:

Gjatë aksionit policor, që u zhvillua pasditen e së mërkurës, ku u ndaluan G.K. (1978) dhe D.S. (1971), u bastisën edhe katër lokacione në Mitrovicë të Veriut. Të ndaluarit do t’i nënshtrohen intervistimit lidhur me dyshimet se kanë shpërndarë fletushkat.

Dy ditë më parë, policia pati bërë të ditur se në hyrje të ndërtesave dhe në rrugë të ndryshme në Mitrovicën e Veriut, komunën e banuar nga shumica serbe u zbuluan fletushka që bënin “thirrje për rezistencë” dhe po ashtu “nxitje të urrejtjes”. Sipas autoriteteve, këto fletushka ishin shpërndarë gjatë dhe pas një proteste të serbëve në Mitrovicë të Veriut të mbajtur më 12 shkurt. Protestuesit kundërshtuan vendimin për ndalimin e dinarit serb lidhur me kryerjen e pagesave në Kosovë.

Fletushkat që mbanin firmën e “Mbrojtjes Popullore” dhe që ishin shpërndarë në kanale të ndryshme në Telegram, përmbanin udhëzime të supozuara për rezistencë ndaj policisë së Kosovës. Ndër të tjera, në këto fletushka, thuhej se “policia e Kosovës duhet të qëllohet me ndonjë mjet, të pështyhen policët e të ofendohen”. Pastaj, të thyhen makinat e policisë me ndonjë mjet, si dhe jepen udhëzime për mënyrën si të bëhen koktej molotovi e gjëra të ngjashme me këto.

Media Radio Evropa e Lirë nuk ka mundur të verifikojë autenticitetin e këtyre fletushkave të shpërndara në rrjetin social, Telegram.

Lista Serbe, partia kryesore e serbëve në Kosovë dhe që gëzon mbështetjen e Beogradit zyrtar, deklaroi se kushdo që i ka bërë këto veprime, ka pasur për synim të minojë paqen e gjithashtu të thellojë paqëndrueshmërinë. Kjo në mënyrë që serbët të fajësohen për incidente të reja të mundshme.