Presidenti i SHBA Joe Biden tha se ishte i shkatërruar për vdekjen e shtetasit izraelito-amerikan Itay Chen, për të cilin zyrtarët izraelitë njoftuan të martën se ishte vrarë nga Hamasi më 7 tetor.

“Në dhjetor, babai dhe vëllai i Itay u bashkuan me mua në Shtëpinë e Bardhë, për të ndarë agoninë dhe pasigurinë me të cilën janë përballur ndërsa luteshin për kthimin e sigurt të të dashurit të tyre”, shkroi Biden në një postim.

“Askush nuk duhet të durojë qoftë edhe një ditë nga ajo që ka kaluar”, shtoi ai.

CNN raportoi më herët se zyrtarët në administratën e Biden thanë se ishin informuar për vdekjen e Chen nga zyrtarët izraelitë të martën.

“Publiku izraelit ka humbur besimin në aftësitë drejtuese të Benjamin Netanyahut që nga fillimi i luftës në Gaza’. Kjo u zbulua në raportin vjetor të inteligjencës amerikane mbi kërcënimet ndaj sigurisë së SHBA.

Agjencitë amerikane paralajmërojnë gjithashtu se presin “protesta të mëdha që kërkojnë dorëheqjen e tij dhe zgjedhje të reja në javët e ardhshme. Një qeveri tjetër, më e moderuar është një mundësi.”

Nga ana tjetër breshëri raketash të Hezbollahut kundër Izraelit verior. Militantët libanezë lëshuan 70 raketa në lartësitë e Golanit në një nga sulmet më të rënda që nga 7 tetori, njoftuan Forcat e Mbrojtjes të Izraelit (IDF). Aktualisht nuk ka asnjë lajm për viktima.