Ndoshta ju vetë jo, por me siguri keni në rrethin tuaj shoqëror miq që “lënë kokën” pas muzikës dhe e kanë të pamundur të rrinë në një ambient ku mbizotëron qetësia. Sipas ekspertëve, zhurma në sfond shërben si shpërqendrim. Kjo është një mënyrë e efektshme, ku ne mbushim kapacitetin tonë të vëmendjes deri në maksimum me stimuj të tjerë, në përpjekje për të mos pasur më burime rezervë për gjërat që po përpiqemi të shmangim dhe të mos mendojmë.

Ndërkaq, teksti i këngës suaj të preferuar thotë shumë më tepër për ju sesa preferencat tuaja muzikore. Sipas kërkimeve të reja shkencore, nëse preferoni këngë si Someone Like You nga Adele, marrëdhëniet tuaja ka të ngjarë të karakterizohen nga një vuajtje. Studimi i ri, i botuar në revistën Personal Relationships, zbuloi se tekstet e këngëve tona të preferuara priren të korrespondojnë me stilin tonë të lidhjes.

Teoria e lidhjes u zhvillua për herë të parë nga psikologu britanik John Bowlby. Ai sugjeron që lidhjet që njerëzit krijojnë në fëmijërinë e hershme ndikojnë në mënyrën se si ata ndërtojnë marrëdhënie të tjera më vonë në jetë. Si lidhen këngët tona të preferuara me mënyrën se si lidhemi? Sipas këtij hulumtimi, njerëzit me një stil të sigurt lidhjeje preferojnë këngë të lumtura si ‘I Got You Babe’ nga Sonny & Cher.

Nga ana tjetër, njerëzit me lidhje ambivalente zgjodhën këngë më vajtuese si Someone Like You nga Adele, ndërsa ata me lidhje shmangëse pëlqenin No Scrubs të TLC. Ndërkaq, të interesuarit shprehën preferencën për këngët e Rihanna-s dhe Drake.

Sipas studiuesve, tekstet kanë rëndësi, ndaj kushtojini vëmendje atyre. Tekstet e këngëve tona të preferuara mund të ndihmojnë në vërtetimin e mendimeve dhe ndjenjave tona. Por ata gjithashtu mund të zbulojnë gjëra në lidhje me përvojat tona në marrëdhënie që ne mund të mos i kemi kuptuar.