Ekspertët e udhëtimeve kanë zbuluar se britanikët po dynden në një vend të vogël ballkanik këtë verë, ndërsa vendi gëzon bumin e turizmit, falë plazheve piktoreske, hoteleve dhe restoranteve të lira, shkruan Mark Duell në një artikull për Daily Mail. 120 000 shtetas të Britanisë së Madhe çdo vit vizitojnë tani Shqipërinë, ndërsa sektori i saj i turizmit po lulëzon,

Britanikët po vërshojnë në Shqipëri pasi vendi gëzon një rritje të turizmit falë plazheve të tij me rërë, hoteleve dhe restoranteve të lira. Çdo vit, më shumë se 12 mijë shtetas të Britanisë së Madhe  vizitojnë tani vendin ballkanik, i cili ishte nën sundimin komunist deri në vitin 1992, pasi sektori i tij turizmit gëzon vitin më të suksesshëm deri më sot.

Këtë dimër, vendi malor do të jetë edhe më tërheqës për britanikët  kur “Ryanair” dhe “Wizz Air” të nisin fluturimet e reja buxhetore. Sipas Skyscanner, muajin e kaluar u regjistrua një rritje e numrit të udhëtimeve nga Britania e Madhe në Shqipëri që nga fillimi i 2022-shit. Për dy persona, mesatarja e vaktit  në një restorant të nivelit të mesëm në Shqipëri është vetëm 29 paund në total, ndërsa një birrë kushton mesatarisht 1.67 paund.

Qytetet më të lira për një vakt janë Shkodra dhe Vlora ku kushton vetëm 21 paund për dy persona. Qyteti më pak i kushtueshëm për një birrë është Berati. Shifrat e përpiluara nga baza e të dhënave të kostos së jetesës “Numbeo” zbuluan se Tirana është vendi më i shtrenjtë për një vakt jashtë, por ende është vetëm 33 paund për dy persona, ndërsa një birrë kushton 1.70 paund.

Hotelet janë gjithashtu të arsyeshme, sipas të dhënave të Booking.com që tregojnë se hotelet me tre yje në Tiranë kushtojnë vetëm 41 paund nata, me katër yje 60 paund dhe 116 paund, hotelet me pesë yje. Akomodimi edhe më i lirë mund të gjendet në qytetin piktoresk mesjetar të Beratit, ku një hotel me tre yje kushton mesatarisht vetëm 31 paund në natë.

Ndërsa inflacioni i lartë është i shfrenuar në Britani, shumë familje po kërkojnë opsione më të përballueshme kur planifikojnë pushime jashtë vendit. “Ryanair” është caktuar të shfrytëzojë sa më shumë interesin në rritje për Shqipërinë duke prezantuar fluturime të reja nga Stansted, Manchester dhe Edinburgh më 31 tetor.

Fluturimi i tij i parë nga Stansted do të jetë më 31 tetor në orën 06:30 të mëngjesit me çmime nga vetëm 17 paund. Do të ketë gjithashtu një fluturim të parë nga Mançesteri në 06:05 të mëngjesit më 31 tetor, me një çmim 42 paund. I pari nga Edinburgu do të largohet në orën 13:45, duke kushtuar 55 paund. Fluturimet më të lira të “Ryanair”-it nga Londra në nëntor, aktualisht kushtojnë vetëm 39 paund vajtje-ardhje.

Linjat e reja janë ndër 17 që “Ryanair” nis nga Tirana për orarin dimëror të këtij viti. Linja ajrore tha se Shqipëria do të bëhet vendi i 37-të në rrjetin e saj dhe do të ofrojë deri në 200 fluturime javore në të gjithë Europën.

Ndërkohë “Wizz Air”, që ka operuar drejt Tiranës nga qendra e saj kryesore në Britaninë e Madhe në “London Luton” që nga viti 2018 do të nisë fluturimet nga Liverpool, Birmingham dhe Edinburgh këtë dimër. Vitin e kaluar, 463 451 pasagjerë fluturuan në Tiranë nga Londra dhe Ministria e Jashtme thotë se mbi 120 mijë shtetas britanikë vizitojnë Shqipërinë çdo vit.

Shqipëria po shijon vitin e saj më të suksesshëm të turizmit deri më tani, pasi është vizituar nga 3.4 milion shtetas të huaj gjatë 6 muajve të parë të këtij viti. Kjo ishte një rritje prej 33% në vitin 2022, sipas Institutit të Statistikave. Vetëm qershori regjistroi mbi një milion vizita, 15% më shumë në të njëjtën periudhë të vitit të kaluar.

Këto shifra janë të larta në krahasim me vitin 2010 kur Shqipëria priti vetëm 1.28 milion turistë ndërkombëtarë gjatë gjithë vitit. Edhe në vitin 2019, kjo shifër ishte trefishuar gati në 3.3 milion për të gjithë vitin. Por tani një numër i ngjashëm po hyn në vend në vetëm gjashtë muaj.

Laura Lindsay, ekspertja e tendencave të udhëtimit në “Skyscanner”, tha për MailOnline se Shqipëria ka qenë në radarin e udhëtarëve që kërkojnë diçka ndryshe prej kohësh, por meqë kërkesat për udhëtime është rritur, po depërton si një destinacion popullor pushimesh.

Shumica e njerëzve ende nuk e kanë zbuluar atë, por fluturimet dhe infrastruktura turistike janë në vend dhe ka më pak turma. Gjithashtu plazhet e bukura të Rivierës Shqiptare dhe kostoja më e lirë e jetesës e bëjnë atë një destinacion të shkëlqyer veror me buxhet. Shqipëria ka qytete historike për t’u eksploruar dhe një skenë në lulëzim festivalesh me ngjarje që zënë vendin e tyre në të gjithë kalendarin muzikor botëror.

Andrea Godfrey i operatorit turistik “Regent Holidays”, i tha “Daily Telegraph”-it se kompania regjistroi një rritje prej 42% të kërkesave dhe një rritje prej 62% të rezervimeve për Shqipërinë gjatë vitit të kaluar.

Ka patur një rritje të konsiderueshme të interesit për Shqipërinë, nxitur kryesisht nga perceptimi i saj si një destinacion plazhi me vlerë për paratë. Po shohim gjithashtu një klientelë më të re në moshë, për shkak të popullaritetit të plazheve të Shqipërisë në Instagram.

Shqipëria ka një popullsi prej 2.7 milion banorësh dhe është një destinacion relativisht i pazbuluar për britanikët, me italianët që aktualisht përbëjnë pjesën më të madhe të turistëve. Aeroporti kryesor ndërkombëtar është në Tiranë, por ka një tjetër në Kukës, afër kufirit me Kosovën. Një i tretë në Vlorë, pranë bregut është në ndërtim e sipër dhe do të përfundojë prillin e ardhshëm.

Kjo pritet të sjellë shumë më tepër turistë për shkak të vendndodhjes kryesore në disa nga plazhet më të mira të Shqipërisë, ndërsa operatorët në Britani pritet të shfrytëzojnë sa më shumë duke nisur marrëveshjet e reja të pushimeve atje.

Disa operatorë turistikë që kryejnë udhëtime për britanikët në plazhet e Shqipërisë së Jugut, i dërgojnë ata në Korfuz dhe më pas i kalojnë me traget, çka zgjat rreth 30 minuta.

Diku tjetër në Shqipëri, zonat e njohura historike përfshijnë vendet arkeologjike të Apolonisë dhe Butrintit, si dhe qytetin malor të Beratit, ku të gjithë vizitohen shpesh.

Por, shumë emigrantë shqiptarë po udhëtojnë në drejtim të kundërt. Nga 45 755 personat që kaluan Kanalin Anglez me varka të vogla vitin e kaluar, 12 301 ose më shumë se një e katërta erdhën nga Shqipëria dhe shumica kërkuan azil pasi mbërritën.

Rritja e kalimeve të Kanalit thuhet edhe se ka çuar në rritje të krimit në Britani, me 80 emigrantë shqiptarë të dënuar për vepra penale duke përfshirë vrasjen, përdhunimin e rrëmbimin vetëm në katër muajt e parë të vitit.