Në një reagim për zhvillimet e fundit në veri të Kosovës, me një polic të vrarë dhe një tjetër të plagosur, kryeministri Edi Rama thotë se “tragjedia e humbjes së jetës së efektivit të Policisë së Kosovës është kambana më e madhe e alarmit deri më sot për rrezikun e vazhdueshëm të eskalimit të krizës së zgjatur në një konflikt të armatosur”.

Sipas shefit të qeverisë, komuniteti ndërkombëtar “duhet të mbledhë të gjithë forcën e tij imponuese dhe të ulë pa kthim, Kosovën dhe Serbinë në tryezën e Dialogut të Normalizimit”. Kryeministri Rama kërkon që “kriminelët që i morën jetën një njeriu të pafajshëm, i cili shërbente nën uniformën shtetërore të forcave të rendit të Republikës së Kosovës, duhet të dalin përpara drejtësisë”.

Komuniteti euroatlantik duhet të mbledhë të gjithë forcën e tij imponuese dhe të ulë pa kthim, Kosovën dhe Serbinë në tryezën e Dialogut të Normalizimit. Thirrja e një konference të jashtëzakonshme paqeje, nën mbikqyrjen e garancinë e Bashkimit Europian dhe Shteteve të Bashkuara, e njëkohësisht marrja e të gjitha masave të jashtëzakonshme me KFOR-in, për moslejimin e eskalimit të mëtejshëm të situatës, janë një domosdoshmëri strategjike jo vetëm për rendin e sigurinë në Kosovë sot, po edhe për paqen e të ardhmen e rajonit nesër, përpara sesa kriza e zgjatur në Veriun e Kosovës të dalë jashtë kontrollit e të kthehet në një zjarr destabilizues për krejt rajonin.

Më herët, reaguan dhe presidenti Bajram Begaj e kryediplomati Igli Hasani.  Për kryetarin e shtetit, “ky akt i organizuar kriminal është cënim i rëndë i rendit dhe sigurisë së Republikës së Kosovës”. Begaj i bën thirrje komunitetit ndërkombëtar “të reagojë me vendosmëri ndaj urdhëruesve dhe zbatuesve të këtij akti”, që e cilëson “tejet të rëndë për stabilitetin e Kosovës dhe paqen në Ballkanin Perëndimor”.

Ministri për Evropën dhe Punët e Jashtme, Igli Hasani dënoi me ashpërsi sulmin me armë ndaj Policisë dhe shtetit të Kosovës, ndërsa shkroi se “akti i sotëm kriminal është kërcënim për sigurinë e stabilitetin e rajonit tonë dhe autorët duhet të përballen sa më parë me drejtësinë”. Hasani thekson se Shqipëria është në krah të Kosovës në këto momente të vështira që kërkojnë gjakftohtësi, në bashkëpunim të ngushtë me aleatët e partnerët.