Zjarri shkrumbon një mobilieri në Lushnje, dyshohet shkëndijë elektrike!
Shkrumbohet një mobilieri në Krutje të Lushnjes, shkaktohen dëme materiale të mëdha. Mësohet se ngjarja ndodhi rreth orës 02:00 të mëngjesit e për shkak se në momentin e rënies së zjarrit nuk kishte njerëz, njoftimi u dha me vonesë. Ndërhyrja e zjarrfikësve bëri të mundur lokalizimin e shuarjen e flakëve, por pa mundur të shpëtohet gjë nga mobilieria.
Prania e lëndëve drusore e kimike favorizoi përhapjen e tyre me shpejtësi dhe gjithçka u dogj në pak minuta. Sipas policisë, shkak dyshohet se ishte një shkëndijë elektrike, por hetimet vazhdojnë për zbardhjen e plotë të rrethanave.
Po në Lushnjë, por në fshatin Bubullimë u shënua një tragjedi tre ditë më parë (14 dhjetor), me pasojë vdekjen e një të moshuari, banesa e të cilit u përfshi nga zjarri.
Në njoftimin e policisë të datës 14 dhjetor thuhej:
Rreth orës 07:40, në fshatin Bubullimë, Lushnjë, dyshohet si pasojë e një shkëndije elektrike, ka rënë zjarr dhe është djegur banesa e shtetasit K.K., 82 vjeç. Për pasojë, ka ndërruar jetë 82-vjeçari. Grupi hetimor po punon për zbardhjen e shkakut të rënies së zjarrit.
Viktimë mbeti shtetasi Koli Koçi, i cili jetonte vetëm me gruan në një banesë të rrënuar. Për fat të mirë, bashkëshortja e tij arriti të shpëtonte. Fqinjët treguan se çifti kishte vështirësi ekonomike.